As I gaed doon the granite toun
The schule bell hished the bairns tae Lear
Bit weel I kent that feint the wird
O Scots, their Scottish lugs wad hear

The tongue o Barbour, Ross, Dunbar
Micht weel be Zulu. It's nae tholed
In classroom claik. Sae much the waur
Fin aa maun haud the Inglis mould

Aince-year the moosewabs faa frae Burns
Dominies dicht the hallowed buik
Syne stap it back ... the anely bard
O Scotia that they daurna jouk

O Hugh MacDiarmid, Soutar, Bruce,
Mackie & Rorie feint a straw
Frae Scottish culture, bairns are weaned
The Inglis rose blaws oweraa

Ye deils fa set the bairns darg
Pit this in yer computer's dowp
Gie's back wir sangsters, playwrichts, bards
Ye arena ower heich tae cowp.