Tut-ankh-amen, heid-yin o the dunes
Cairriet a veritable Tescos
O wine, fruit, guid fite breid
Doon tae the fooshtie dwellin o the deid.
(Fur iver an ay yon wizzened runkled prune
Embalmed loon, maun watch an enless matinee
O hieroglyphics. Same show ilkie day)

Tinned like a sprat, A deity hapt in gowd
(Neither at hame in the warld
Nur yet in heevin.)
In pit-mirk limbo, happit in hippens
Clartit wi peintit symbols o the leevin
Nailed doon wioot an opener in his shroud.

I've kent langtime nae pooches line a kist
Nae mochie mausoleum bigg fur me
Na. I'll be grist tae the mill
Pickle sardines an Pharaohs gin ye will
I'll gie ma braith tae cloud
Ma flesh tae glaur
Gang far ben wi the yird
Nae Lazarus-lowps I'll makk ... ye hae ma wird
I'll nae flegg fearty bairns wi orra duddies
Waggin been shanks wi mort-claiths teem o hurdies.