Yule. O a suddenty,
A robin blossoms like a poppy flooer
A rodden wags its airms
(A timmer daddylanglegs, tiltin at the haar)
Sun's wizzened ee glowers doon
Deid parks haud taiglet sheep
Dreich, dour an soor
Birks staun Bach-broon in glaur.

Far deil the birdies threep,
A burnie tummles, thirled noo tae Winter
Its ilkie drap, a linn.

A deein rattle is the chitterin whin
Time skreichs, a brukken winmill, hingin bi a threid
Day rochles in the thrapple, jeels the bluid.

The sabbin ocean reels an rives aneth the lift's fite mawe.
Waves strive like sodjers, in the battle-thraw.

Yuletide, a carlin-wife, is
Wirkin her witcherie, ower ane an aa.