A village voyeur,
Blearie beldame,
Lifts the screen on scandal.
She's maistered the drapped suggestion,
The sleekit question.
Sookin up sklaik,
Auld slorrach,
Horny-gollachin her wye
Ben creepy-crawly chinks
O' disrespectability.
(Gie Satan an inch,
An whaur'll it aa end?)

Ae snifterin, rain-duntin Setterday
She backslid intil the mools.
Hard ben
Frae a lassie, notably
Saft wi' men.

The auld yew haps them baith,
Jawer an jaad:
Twa pints o' the compass,
Baith facin North.