Dae ye ken yer Scots Hallaeen?

Hallaeen, wi its strang tradeetions o dookin fir aipples, carvin neeps an guisin, is an ideal time tae use Scots.

Treacle Scones

Hingin aff a bit o string, scones or pancakes covered in treacle will be nae match for wee yins hungry for a bit o sugar on Hallaeen nicht. Maukit faces guaranteed.
Dookin for aipples

Whit could be better nor dookin yer face in a pail o freezin-cauld watter, tae try an sink yer teeth intae an aipple? Safties try tae dae it wi their mooth only, an haud wide o the watter sae their nebs and chowks dinnae get weet. Fearties yaise a fork atween their teeth.
Guisin

Traipsin roon folk’s hooses covered in face-pent an weirin a costume that yer maw pit thegither, yaisin bin bags an cheils left lyin in the scullery drawer, is a tradeetion that we keep close til oor herts. Ye better hae a joke or a wee rhyme ready tae get yer Hallaeen bag, that’ll hae monkey nuts, sweeties an mibby even a siller coin intil’t.
Hallaeen cakes

Naething beats a sponge cake, covered in mallas, joob-joobs and hunners o coloured icin. If yer teeth urnae gowpin efter eatin it, ye’ve no done it richt!
Kale pulling

Pit a stalk o the kail ower the door o yer hoose an the first body tae come ben will either be the intendit, or will hae the same first name at least.
Sweethert Nuts

Ae haunfae wad be gien the names o aw the aesome ladies an lassies fae amang the circle o freens, an set oot afore an open fire . As the twa sets o nuts sterts poppin for the heat custom threaps that the names o the ladies an lassies poppin will gae thegither.
Cairve a neep

Whither ye cry it a Neepie Lantrin, a Tumshie Lamp, or a Baigie, get howkin! Haurd gaun but wirth the sweit. Drap a caunnel in fir the licht, ye cannae baet the rael smell o Hallawe’en.
Bring in the Galoshies!

Comin fae the Galoshin pleys performit in Scotland aroon aboot hogmanay this phrase cam for tae be cryit at the door o onie kin o guisin, an for monie is noo ainly heard at Hallae’en.
Dae a turn

Fir tae get yer hallae’en pock ye’ll hae tae dae a turn, a poyum, a sang, or yer best joke will be the verra dab!