Giggling Jock is the title o an event the morn's nicht at the Stand Comedy Club in Embra. Susan Morrison is hosting the evening as pairt o Previously - Scotland's Festival of History. She'll be lookin at whit maks Scots lach an whit it is that gies Scottish comedy its unique character. It looks like it'll be a braw nicht an if ye're in the capital I canna think that ye'd be disappyntit if ye went alang tae it.

We've been thinkin aboot Scots language comedy here at the Centre an lookin back ower the last hunner years at whit's got fowk lachin. Ane o the maist interesting aspects tae Scottish comedy is hou muckle o it is in Scots. Ower the next twa-three months I'll be postin links tae some o the best Scots language humour on the internet. I hope ye’ll enoy this wee keek at some o whit’s oot there.  

Monologues wis a popular Scots cultural form in the 19t century an at the stert o the 20t. These monologues are still able to communicate the essence o the pawky Scots wey o lookin at the warld. Daena be pit aff by the auld farrant subject maitter – they’re clever, dramatic an satirical. Oh aye, an they mak ye lach an aa. Here is the Deputation to the Minister – the Scots vairsion o Babette’s Feast, mibbe?