A new fower pairt braidcast anent the culture an identity o Scots-speaking Ulster is awa tae air on NVTV fae Tuesday 25 Februar. Cryed A Wee Drapp An A Yarn, hostit bi Frank Ferguson, an wi siller an uphaud fae Norland Irland Screen’s Ulster Scots Braidcast Fund, thir sindry programmes will reenge the history, customs, an leid o fowk in Ulster as seen throu the een o the wabsters o bygane days an thair poyems. The setting o thir programmes will hae the feel o fowk in a howf haudin a twa-wey crack anent days o langsyne, speirin hoo sib thae days micht be til oor ain skeel o life the day, an whit the time tae come micht haud.

The first pairt will be aired Tuesday 25 Februar 2025 at 8pm, but a body will can see the hail o it bi gait o www.ulsterscots.nvtv.co.uk or bi gait o Youtube@nvtv_Belfast.

The’r a soond file o this story in Scots abuin.

Kist o Riches (Tobar an Dulchais) alang wi Eden Coort, haes pit oot the caw for twa young airtist musicians tae come an wirk in aboot the Kist o Riches wabsteid, an for tae mak thair ain music an verse unner a project cryed Sgrìobh/Scrieve. The twa bodies – ane throu Gaelic an ane throu Scots – will speir-oot materials fae the Kist o Riches wabsteid an will pit thegither a new sang agin the Under Canvas fest in 2025. The airtists will be peyed £1,200 for makkin the new sang, alang wi siller forby for takkin pairt in the fest.

Aw thaim wi an intress in pittin in for the posts shuid tak tent that airtists maun be aged atween 18 an 27 year auld, bide haily in Scotland, maun be versant in either Scots Gaelic or ane o the dialects o Scots, an maun lowse the project bi the end o Jooly 2025.

A body shuid see on thair CV, alang wi a letter, at’s nae mair nor a page, statin whit wey ye’d like tae tak pairt, an hoo ye wad dae mense tae Kist o Riches. Thir papers shuid be sent bi the deidline o Sunday 23 Mairch 2025, an can be pit in either as a bit screive o nae mair nor 500 words, a video or soond recording o nae mair nor 5 meenits, or as a presentation o nae mair nor 10 slides an 500 words. Aw papers shuid be sent til Emily MacDonald bi gait o email at emacdonald@eden-court.co.uk alang wi only links an materials forby. An please speir at Emily MacDonald for ony mair wittins anent the project.

The'r a soond file o this news story in Scots abuin.

No lang syne Dictionars o the Scots Leid brocht oot a split-new wark cryed 100 Scots Words from Outlander. Set oot efter the fashion o Scots Word of the Week, an 100 Favourite Scots Words, this split-new wark is grundit on vocabular used bi the screivar Diana Gabaldon in her Outlander buiks set in 18ct century Scotland an ayont in the years afore an efter the Jacobite rising o 1745. Dictionars o the Scots Leid askit a wheen o readers tae pit thegither leets o Scots words waled oot the novels an 100 o them wis used tae pit this new buik thegither. Diana Gabaldon hersel took pairt in the project, wrate an inning, an alloued walings fae the Outlander buiks.

Awbody wi an intress can clap thair device here dictionary.scot/outlander for free ingait online.

The'r a soond file o this story in Scots abuin.

Braidcaster Alistair Heather haes pit thegither a new shaw bi gait o BBC Radio 4 that wis first aired on 7 Januar an is cryed Beyond Burns. Steidit in Dundee, Heather hauds a twa-wey crack wi sindry poyets braid Scotland, an whiles a makar or twa, anent thair screivings an warks. Heather haes a parteeclar intress in shawin the poyets that wirks oot o Angus, a pairt o the kintra that haes lang gien us lettert fowk, but isna necessar appearant in modren accoonts o the leid, an sae he sterts oot wi poyet Taylor Dyson. In this shaw he will veesit fowk in Aiberdeen, the Orkney isles, an ither airts forby. Speakin anent the teetle o the shaw, Heather threapit that he wantit tae get ayont Burns an shaw us the mony ither, modren poyets an the ken that thay hae o thair ain pairts o Scotland. Sae please lug in tae BBC Radio 4 for tae hear mair.

The'r a soond file o this story in Scots abuin.

It is noo 16 year (2008) fae the General Assemly o the Unitit Nations awned an took-on the bonnie owersettin in Scots o the Universal Declaration o Human Richts. First set oot in 1948, the ettle ahin the Declaration wis tae estaiblish aw the maist ordnar freedoms for Jock Tamson’s bairns, an, in 2004, the makar, musician an screivar, Colin Donati, wis the first body tae pit it intae Scots, the hail 30 airticles comprehendit.

A body can dounlaid the text o Colin Donati’s version in Scots as a PDF ablow.

The’r a soond file o this story in Scots abuin.